बेँसीसहर–चामे सडक दुई दिन बन्द, दानाक्यु नजिकै सडक मर्मत हुंदै

मनाङ,  हिमालपारिको जिल्ला भनेर चिनिने मनाङ जिल्ला जोड्ने एकमात्र बेँसीसहर–चामे सडक आज (शनिबार) देखि दुई दिन बन्द हुने भएको छ ।
बेसिशहर–चामे सडक अन्तर्गत नासोँ गाउँपालिका–९ दानाक्यु नजिकै सडक मर्मतका लागि आज (शनिबार) दिउँसो २ बजेदेखि आइतबार बिहान १० बजेसम्मका लागि सडक बन्द हुने भएको हो ।
सडकको ढलान भत्किएर जोखिम बढेकाले र वैकल्पिक सडक नभएकाले बन्द गरेर मर्मत गर्नु परेकाले उक्त समयसम्मका लागि यातायात पूर्णरुपमा ठप्प हुने भन्दै जिल्ला प्रशासन कार्यालय मनाङले सूचना जारी गरेको छ । डुम्रे–बेँसीसहर चामे सडक योजना कार्यालयका इन्जिनियर सुमन अधिकारीले दानाक्यु नजिकै कल्भटको वरिपरि भत्किएको र बाटोमा ढुंगा निस्किएकाले मर्मत गर्न लागिएको बताए । सवारी साधन सञ्चालनमा धेरै समस्या हुन थालेपछि उक्त ठाउँमा सामान्य मर्मत हुने भए पनि वैकल्पिक सडक नहुँदा यस सडक नै बन्द गर्नुपर्ने भएको उनको भनाइ छ ।
मनाङलाई सडक सञ्जालमा जोड्ने सरकारको योजना अनुरूप २०५१ सालदेखि सडक डिभिजन कार्यालय दमौली–तनहुँ शाखाले बेँसीसहर चामे सडक निर्माण अघि बढाएको थियो । नेपाली सेनाले २०६९ सालमा सडक निर्माण गरी सडक डिभिजन कार्यालयलाई हस्तान्तरण गरेको थियो । उक्त सडक ६५ किलोमिटरमध्ये लमजुङतर्फ ३५ र मनाङतर्फ ३० किलोमिटर पदर्छ ।