गोरखाको कनटारमा माइक्रोबस दुर्घटना, सात जनाको घटना स्थलमै मृत्यु ।

गोरखा, गोरखा जिल्लाको सहिद लखन गाउँपालिका–३, कनटारमा माइक्रोबस दुर्घटना हुदाँ सात जनाको घटना स्थलमै मृत्यु भएको जिल्ला प्रहरी कार्यालय गोरखाले जनाएको छ ।
बागमती प्रदेश ००६ ख ८४३० नम्बरको माइक्रोबसमा १४ जना तीर्थयात्रु मनकामना मन्दिर दर्शन गरेर गन्तव्यतर्फ फर्कने क्रममा अचानक नियन्त्रण गुमाएर सडकबाट दुई मिटर तल खसेको थियो । त्यसमा सवारमध्ये पाँच पुरुष र दुई महिला गरी सात जनाको घटनास्थलमै मृत्यु भएको छ भने सात जना गम्भीर घाइतेलाई उद्धार गरी तनहुँको आँबुखैरेनी अस्पताल लगिएको प्रहरीले जनाएको छ ।
प्रहरी उपरीक्षक भरतबहादुर विकका अनुसार घटनापछि प्रहरी टोली र स्थानीयको सहयोगमा उद्धार गरिएको थियो । मृतक सबै भारतीय नागरिक रहेका छन् । शव पोस्टमार्टमका लागि अस्पताल पठाइएको छ । दुर्घटनाबारे विस्तृत विवरण आउन बाँकी रहेको प्रहरीले जनाएको छ ।