ताप्लेजुङ सदरमुकाम फुङलिङमा अनिश्चितकालीन निषेधाज्ञा जारी ।

ताप्लेजुङ, ताप्लेजुङको धार्मिक पर्यटकीय स्थल पाथीभरा क्षेत्रमा केबलकार निर्माणको विरोधमा सुरु भएको आन्दोलन नरोकिएपछि स्थानीय प्रशासनले निषेधाज्ञा जारी गरेको छ ।
आज (आइतबार)बिहान ५ बजेबाट लागू हुनेगरी जिल्ला सुरक्षा समिति, ताप्लेजुङको बैठकले फुङलिङको बजार क्षेत्र र काफ्लेपाटीको बल्लुडाँडा क्षेत्रमा अनिश्चितकालीन निषेधाज्ञा जारी गरेको हो ।
ताप्लेजुङका प्रमुख जिल्ला अधिकारी नेत्रप्रसाद शर्माका अनुसार प्रदर्शन र जुलुसका कारण स्थानीय स्तरमा प्रतिकूल स्थिति सिर्जना भई शान्ति सुरक्षा भंग हुन सक्ने परिस्थिति देखिएपछि शनिबार राति बसेको जिल्ला सुरक्षा समितिको बैठकले निषेधाज्ञा जारी गरेको हो ।प्रशासनले निषेधाज्ञा जारी भएको क्षेत्रमा पाँचजनाभन्दा बढी व्यक्ति भेला भएर सभा, जुलुस, प्रदर्शन गर्न पनि रोक लगाएको छ ।

निषेधाज्ञा क्षेत्रको सीमा
१. फुङलिङ नगरपालिका बजार क्षेत्र
पूर्व ः फुङलिङ–७, सल्लेरी
पश्चिम ः फुङलिङ–७, घोडेचौर (थलाङ धारा क्षेत्रसम्म)
उत्तर ः फुङलिङ–४, उकालीपानी
दक्षिण ः फुङलिङ–६, शेर्पा टोल (भेटनरी कञ्चनजंघा टोल)
२. काफ्लेपाटी–बल्लुडाँडा क्षेत्र
पूर्वः पर्यटक प्रहरी भवनको १०० मिटर इलाका
पश्चिमः बल्लुडाँडा र डडेले इलाका
उत्तर ः केबलकार बेस स्टेशन
दक्षिण ः नयाँ बसपार्क इलाकाको १०० मिटर (जंगल इलाका समेत)