बेलायतका नेपालीलाई हुलदंगामा सहभागी नहुन र सुरक्षा सतर्कता अपनाउन आग्रह ।

काठमाण्डौँ, बेलायतस्थित नेपाली दूतावासले बेलायतमा रहेका नेपालीहरूलाई सुरक्षा सतर्कता अपनाउन आग्रह गरेको छ ।
मंगलबार एक सूचना जारी गर्दै दूतावासले नेपालीलाई हुलदंगा भएको स्थानमा भ्रमण नगर्न, सहभागी नहुन आग्रह गरेको छ ।
राजदूतावासले वर्तमान परिस्थितिलाई नजिकबाट नियालिरहेको छ । यस्तो अवस्थामा सम्पूर्ण नेपाली नागरिकलाई आवश्यक सुरक्षा सतर्कता अपनाउन एवं स्थानीय सञ्चारमाध्यम तथा सुरक्षा निकायले जारी गरेको सूचनाहरू ध्यानपूर्वक पालना गर्न अनुरोध गरिन्छ, सूचनामा भनिएको छ ।

साथै, बेलायतस्थित् नेपाली संघ–संगठनलाई आफ्नो संस्था तथा समुदायमार्फत नेपाली नागरिकलाई सुरक्षा सतर्कता अपनाउने सम्बन्धमा जानकारी गराउन पनि दूतावासले आग्रह गरेको छ । आपत्कालीन अवस्था आए दूतावासलाई सम्पर्क गर्न सूचनामा आग्रह गरिएको छ ।
बेलायतका विभिन्न सहरमा केही दिनदेखि हिंसात्मक प्रदर्शन भइरहेको छ ।