२०८१ श्रावण १०

सहुलियत पसलबाट आठ करोडभन्दा बढीको करोबार,पसल पुस मसान्तसम्म सञ्चालन हुने

काठमाडौँ, खाद्य व्यवस्था तथा व्यापार कम्पनीले चाडपर्वलक्षित गरी सञ्चालन गरेको सहुलियत मूल्य पसलबाट आठ करोड रुपियाँभन्दा बढीको कारोबार गरेको छ ।
असोज २१ देखि मङ्सिर १९ सम्म खाद्य कम्पनीले उपत्यकासहित देशका ४९ स्थानमा सञ्चालित सहुलियत मूल्य पसलबाट आठ करोड ३० लाख पाँच हजार ८ सय ५९ रुपियाँ बराबरको कारोबार गरेको हो ।
खाद्य कम्पनी बागमती प्रदेशका बिक्री प्रबन्धक प्रमुख ज्ञानु थापाले वस्तु र सेवाका हिसाबले सबैभन्दा धेरै चामल, तेल, आँटा र चिउरा बिक्री गरे पनि रकममा सबभन्दा बढी कारोबार च्याङ्ग्रारा र खसीबोकाको भएको जानकारी दिए ।


आगामी पुस मसान्तसम्म सञ्चालन हुने खाद्य कम्पनीको सहुलियत मूल्य पसलबाट बिक्रीका लागि राखिएका १२ प्रकारका चामलमध्ये सबैभन्दा धेरै स्टिम जिरा मसिनो र अरुवा सोना मनसुली चामल बिक्री भएको छ । तीन करोड ५१ लाख १८ हजार बढीको चामलको कारोबार भएकामा एक करोड ७२ लाख १९ हजार रुपियाँको स्टिम जिरा मसिनो र अरुवा सोना मनसुली २५ केजीवाला ९८ लाख रुपियाँभन्दा बढीको बिक्री भएको जनाएको छ । बाँकी मोटा चामल, बासमती, कागुनो, चिनो, लङ ग्रेन, काला नुनिया, मार्सी चामल बिक्री भएको छ ।
सरकारसँग अनुदान लिएर चाडपर्वका बेलामा खाद्य कम्पनीले खसीबोका र च्याङ्ग्रा मात्रै चार करोड ८३ लाख रुपियाँभन्दा बढीको सबैभन्दा धेरै कारोबार गरेको छ । एक करोड ७५ लाख ६८ हजार ६९० रूपियाँ बराबरको च्याङ्ग्राको कारोबार भएको छ भने दुई करोड ५२ लाख ४९ हजार रुपियाँको खसीको कारोबार भएको छ । यस्तै सो अवधिमा ५५ लाखभन्दा बढी मूल्यको बोका बिक्री भएको छ ।

Consumers throng Fair Price Shop at Jadibuti operated by Nepal Salt Trading Ltd in Kathmandu, on Wednesday, September 28, 2016. Photo: RSS

यस्तै सो अवधिमा खाद्य कम्पनीले ३७ लाख ८० हजार बढीको दाल, कर्णालीको सिमी, फापर, चिउरा र गहुँ बिक्री गरेको भने ४७ लाख ८५ हजार रुपियाँको खाने तेल र चिनी बिक्री भएको छ ।
त्यसै गरी नौ लाख ९३ हजार रुपियाँको ग्यास, विद्युतीय चुलो र भाँडा बिक्री गरेको कम्पनीले जनाएको छ । खाद्य कम्पनीले उपत्यकासहित देशका ४९ वटा स्थलबाट बिक्री गर्दै आएकामा सबैभन्दा धेरै कारोबार कम्पनीको बागमती कार्यालय थापाथलीबाट लगभग पाँच करोड रुपियाँको कारोबार भएको कम्पनीले जनाएको छ ।