इलामलाई १–० गोलले हराउँदैे पोखरा शीर्ष स्थानमा

काठमाडौं, पोखरा थन्डर्सले स्पोर्टिङ इलाम डे मेची एफसीविरुद्ध १–० को जित निकाल्दै नेपाल सुपर लिगको दोस्रो संस्करणमा अपराजित यात्रालाई कायम राखेको छ ।
त्रिपुरेश्वरस्थित दशरथ रंगशालामा सम्पन्न रोमाञ्चक खेलमा पोखरालाई जित दिलाउन सञ्जिवले गरेको गोल निर्णायक बन्यो । खेलको ४६ औँ मिनेटमा सञ्जिव विष्टले गोल गर्दै पोखरालाई अग्रतामा राखेका थिए ।
पहिलो हाफभर इलामको निरन्तर दबाब झेलेको पोखराले मध्यान्तरसम्म गतिलो आक्रमण गर्न सकेको थिएन ।
खेलको सुरुआतबाटै आक्रमण बुनेको इलामले छैटौँ मिनेटमा गोलको सुन्दर अवसर गुमायो । ११ औँ मिनेटमा एक समर्थक मैदान प्रवेश गरेपछि खेल एक मिनेट रोकिएको थियो । उनले मैदानमा इलामका फोडे कामारालाई नेपालको झन्डा ओडाएका थिए ।
प्रतियोगितामा पोखराको यो दोस्रो जित हो । जितसँगै चार खेलबाट आठ अंक जोडेको पोखरा तालिकाको शीर्ष स्थानमा उक्लिएको छ । पोखरा प्रतियोगितामा हालसम्म अपराजित छ । दोस्रो स्थानको धनगढीले भने तीन खेलबाट सात अंक जोडेको छ ।
इलामको भने यो प्रतियोगिताको तेस्रो हार हो । चार खेलमध्ये एकमा जित निकालेको इलाम तीन अंकसहित तालिकाको छैटौँ स्थानमा छ ।