चार महिनामा १६ हजार पर्यटकले मनाङको भ्रमण गरे ।

चामे, पर्यटकीय जिल्ला मनाङमा चिसो बडेसंगै पर्यटकको चहल–पहलमा कमी आएको छ । मंसिरको अन्तिम सातादेखि माधमसान्तसम्म मनाङमा अत्यन्त चिसो हुने भएकाले पर्यटकहरु पनि नआउने भएकाले पहिले–पहिले स्थानीयहरु पनि एक जना घर कुरुवा राखेर न्यानो स्थानमा जाने गर्थे । तर केही बर्ष यता चिसो मौसममा पनि आन्तरिक तथा बाह्य पर्यटकहरु आउने–जाने भएकाले बर्षैभरी मनाङको पर्यटन ब्यवसाय चलायमान हुने गरेको छ ।
आर्थिक बर्ष २०८२–८३ को प्रथम चार महिनामा १६ हजार २९६ पर्यटकले मनाङ भ्रमण गरेको अन्नपूर्ण संरक्षण क्षेत्र आयोजना (एक्याप) इलाका संरक्षण कार्यालय, मनाङको तथ्याङ्क छ ।
अन्नपूर्ण संरक्षण क्षेत्र आयोजना (एक्याप) इलाका संरक्षण कार्यालय, मनाङका प्रमुख ढकबहादुर भुजेलका अनुसार उक्त अवधिमा १०७ देशका नागरिकले मनाङ भ्रमण गरेका छन् ।
मनाङ आएका पर्यटकमध्ये सार्क राष्ट्रका ८१२ पुरुष र १७७ महिला तथा अन्य मुलुकका पर्यटकमध्ये नौ हजार ६९५ पुरुष, ६ हजार ६०१ महिला हुन् । इजरायलका एक हजार ९१०, फ्रान्सका एक हजार ३९२ र जर्मनीका एक हजार २०८ नागरिकले मनाङ भ्रमण गरेको कार्यालय प्रमुख भुजेलले बताए ।