५ नेपाली तिर्थयात्रीको दुर्घटनामा मृत्यु, ४ जना गम्भीर घाइते ।

काठमाण्डौँ, बिहारको मुजफ्फरपुरमा नेपाली चढेको स्कार्पियो गाडी दुर्घटना हुँदा पाँच जना नेपाली दर्शनार्थीको मृत्यु भएको छ भने चार जना गम्भीर घाइते भएका छन् ।
भारतमा भइरहेको महाकुम्भ मेलाबाट नेपाल फर्किंदै गरेको स्कोर्पियो गाडी अनियन्त्रित भएर बिहारको मुजफ्फरपुरमा पल्टिँदा पाँचजनाको घटनास्थलमै मृत्यु भएको भारतीय सञ्चार माध्यमहरूले जनाएका छन् । गाडीमा ९ जना सवार थिए । ४ जना गम्भीर घाइते भएका छन् ।
मृतकमध्ये तीन महिला र दुई पुरुष छन् । मृत्यु हुनेमा अर्चना ठाकुर, इन्दु देवी, मन्त्रणा देवी, बालकृष्ण झा र गाडीचालक शम्भु ठाकुरको पहिचान खुलेको छ । मृतकमध्ये गाडीचालक शम्भु सिरहा र अन्य महोत्तरीका हुन् ।
घाइतेहरूमध्ये मनोहर ठाकुर, सृष्टि ठाकुर, कामनी झा र देवतारण देवी रहेका छन् । घाइतेहरूलाई स्थानीय अस्पतालमा भर्ना गरिएको छ ।
तीव्र गतिमा रहेको स्कार्पियो फोरलेन सडकमा मोटर साइकललाई बचाउने क्रममा दुर्घटना भएको लाइभ हिन्दुस्थान डटकमले जनाएको छ ।
सडकमा बाइक स्टन्ट गरिरहेका युवकहरूलाई जोगाउन खोज्दा गाडी डिभाइडरमा ठोक्किएर पल्टिएको थियो ।
स्कोर्पियो गाडी पूर्ण रूपमा क्षतिग्रस्त भएको छ । प्रारम्भिक अनुसन्धान अनुसार दुर्घटनाको समयमा गाडीको एयरब्याग नखुलेका कारण क्षति भएको बताइएको छ । गाडीमा रहेका सबै महाकुम्भमा स्नान गरेर नेपाल (घर) फर्किंदै थिए ।