चामे, ८ साउन / विश्वकै सर्वोच्च स्थानमा रहेको प्राकृतिक ताल तिलिचो रहेको जिल्ला मनाङमा ५ हजार मिटरभन्दा माथिको उचाईमा अर्को एउटा ताल फेला परेको छ । जिल्लाको सदरमुकाम चामे गाउँपालिकाअन्तर्गत पर्ने सिङगर खर्कमा उक्त ताल फेला परेको हो ।
लम्जुङ बेसक्याम्पमाथि उक्त स्थानमा गुगोलद्वारा खिचिएको खान्जेन सारा ताल समुन्द्र सतहदेखि ५००२ मिटरको उचाईमा रहेको गाउँपालिका श्रोतले जनाएको छ । गुगलमा तालको जानकारी प्राप्त भएको आधारमा खोजि गर्नेक्रममा उक्त ताल फेला परेको स्थानीय मिङमार लामाले बताएका छन् ।
उनका अनुसार चामे गाउँपालिकाका अध्यक्ष लोकेन्द्रबहादुर घले, बन उपभोक्ता समितिका अध्यक्ष एवम् सदस्यहरुका साथै नेपाल प्रहरी, शसस्त्र प्रहरी बल लगायतका करिब २९ जनाको टोली उक्त तालको खोजीका लागि निस्किएको थियो । खोजी कार्य आरम्भ गरेको ४८ घण्टामा हिजो विहान उक्त ताल पत्ता लागेको लामाले जनाएका छन् ।
विभिन्न वन्दोवस्तिका सामान सहित आवश्यक उपकरण लिएर खोजी अभियानमा गएको उक्त टोलीले ताल फेलापरेपछि त्यसको उचाई नाप्ने काम समेत सम्पन्न गरेका थिए । यो ताल पनि मनाङ पर्यटनश्रोतमा अर्को उपलब्धी भएको खोजी कार्यमा संलग्न स्थानीय मिङमार लामाले बताएका छन् ।
तस्बिर : मिङमार लामा (मनाङ)
