चामे, २८ फागुन/हिमाली जिल्लाहरुको मौसममा सुधार आउन थालेपछि जनजीवन सहज बनाउन नेतृत्व तहले समेत पहल शुरु गरेका छन् । 

हिमालपारीको जिल्ला मनाङको सदरमुकामसम्म सवारी आवागमन सूचारु हुन थालेपछि सदरमुकामदेखि माथिल्लो भेगका गाउँसम्मका अबरुद्ध सडक सूचारु गर्न पूर्व श्रम तथा रोजगार राज्यमन्त्री टेकबहादुर गुरुङ र संघीय सांसद कर्म घलेले आवश्यक पहल थालेका छन् ।

सदरमुकाम चामेदेखि खाङसारसम्मको सडकमा जमेको हिउँ पञ्छाउन आफुले स्काभेटर निःशुल्क उपलब्ध गराउने प्रतिबद्धता जनाएपछि त्यसका लागि चाहिने इन्धनको व्यवस्था गर्न सांसद घलेले १ लाख रुपैया प्रदान गरेका छन् । सडक सुचारुका लागि क्रियाशिल रहन सांसद कर्म घले र पूर्व राज्यमन्त्री टेकबहादुर गुरुङले स्थानीय उपभोक्ताहरुलाई निर्देशन समेत दिएका छन् ।

  सडक सूचारु गराउने क्रममा यो समाचार तयार पार्दासम्म ढिकुर पोखरीसम्म बाटो सूचारु भईसकेको सडक सुचारु गर्ने कार्यमा खटिएका स्थानीय जनप्रतिनिधि र कार्यरत जनशक्तिले जनाएका छन् । सडक माथिल्लो मनाङको पिसाङ, ङावल, घ्यारु, भ्राकालगायत मनाङ ङिसाङ गाउँपालिकाको खाङसारसम्म सूचारु गर्ने लक्ष्य रहेको छ ।