चामे, २४ अशोज/ आगामी मंसिर ४ गते सम्पन्न हुने प्रतिविधि सभा र प्रदेश सभाको निर्वाचनका लागि गठबन्धन दलहरुबाट उम्मेदवारहरुको मनोनयन दर्ता गराइएको छ । गठबन्धन दलहरुको समर्थनमा नेपाली कांग्रेस पार्टीबाट प्रतिनिधि सभाको एक मात्र निर्वाचन क्षेत्र रहेको हिमाली जिल्ला मनाङमा प्रत्यक्षतर्फ नेपाली कांग्रेसका केन्द्रीय सदस्य पूर्व श्रम तथा रोजगार राज्यमन्त्री टेकबहादुर गुरुङले आफ्नो पार्टीबाट उम्मेदवारी मनोनायन दर्ता गराएका हुन् ।

त्यसैगरी प्रदेशसभा अन्तर्गत २ निर्वाचन क्षेत्र रहेको जिल्ला मनाङमा गण्डकी प्रदेश सभका लागि नेपाली कांग्रेस र अन्य दलहरुको तर्फबाट उम्मेदवारी मनोनयन दर्ता भएको छ । चुनावी मैदानमा गठबन्धनको समर्थनबाट गण्डकी प्रदेशभामा प्रत्यक्षतर्फ निर्वचन क्षेत्र ‘ख’ का लागि स्वतन्त्र उम्मेदवार गण्डकी प्रदेशका युवा तथा खेलकूद मन्त्री राजीव गुरुङले उम्मेदवारी मनोनयन गर्दा गराएका छन् । 

त्यस्तै गण्डकी प्रदेश सभामा मनाङको निर्वाचन क्षेत्र ‘क’ बाट नेपाली कांग्रेसका मुनिन्द्रजङ्ग गुरुङको उम्मेदवारी मनोनयन दर्ता भएको जिल्ला निर्वाचन कार्यालयले जानकारी दिएको छ । आगामी मंसिर ४ गते सम्पन्न हुने निर्वाचनमा मनाङ जिल्लाबाट प्रतिनिधि सभाका लागि प्रत्यक्ष तर्फ ३ वटा दलहरुबाट ३ जना उम्मेदवारहरुबीच प्रतिष्पर्धा हुने निर्वाचन अधिकृतको कार्यालय मनाङले जनाएको छ । 

आगामी मंसिर ४ गते सम्पन्न हुने प्रतिनिधि सभा र प्रदेश सभाको निर्वाचनमा मनाङ जिल्लाबाट कुल ६ हजार ७ सय ७९ जना मतदाताहरुले मतदान गर्न पाउने छन् । जसमा ३ हजार २ सय ८१ पुरुष र ३ हजार ४ सय ९८ महिलाको नाम मतदाता नामावलीमा सूचीकृत भएको बताईएको छ ।