काठमाडौँ, २० बैशाख / संघीय सरकारमा मन्त्री मण्डल विस्तारक्रम अझै जारी रहेको छ । प्रधानमन्त्री पुष्पकमल दाहालले फेरि मन्त्रिपरिषद् विस्तार गर्ने क्रममा अरु ३ मन्त्री थप गरेका हुन् ।
बुधबार तीन मन्त्रीहरु नियुक्त गर्नका लागि राष्ट्रपति रामचन्द्र पौडेलसमक्ष प्रधानमन्त्री पुष्पकमल दाहालले सिफारिस गरेपछि नेपाली कांग्रेसका ३ मन्त्री नियुक्त गरी कार्यभार समेत तोकिएको छ । नेपाली कांग्रेसबाट पार्टीका उपसभापति धनराज गुरुङ कानुन, न्याय तथा संसदीय मामिला मन्त्रीको कार्यभार पाएका छन् भने मोहनबहादुर बस्नेत स्वास्थ्य तथा जनसंख्या मन्त्रालय पाएका छन् । त्यसैगरी डिगबहादुर लिम्बूलाई युवा तथा खेलकुद मन्त्रालयको कार्यभार दिईएको राष्ट्रपतिको कार्यालयले जनाएको छ ।
सत्ता गठबन्धनमा कांग्रेसको भागमा परेका ८ मन्त्रालयमध्ये बाँकी रहेका तीनवटा मन्त्रालयमा मन्त्री नियुक्त भएपछि नेपाली कांग्रेसले सत्ता गठबन्धनमा नेपाली कांग्रेसको भाग पूरा भएको छ । यसअघि पुर्णबहादुर खड्का उपप्रधान तथा रक्षा मन्त्री बनेका छन् भने अर्थ मन्त्रीको जिम्मेवारी डा. प्रकाशसरण महतले सम्हालेका छन् । त्यसैगरी उद्योग, बाणिज्य तथा आपूर्ति मन्त्रालय रमेश रिजालले सम्हालेका छन् । त्यस्तै परराष्ट्र मन्त्री एनपी साउद रहेका छन् र सीता गुरुङले शहरी विकास मन्त्रीको जिम्मेवारी लिएकी छिन् । आज नियुक्ती भएका मन्त्रीहरुले भोली विहीवार दिउसो सपथ ग्रहण गर्ने कार्यक्रम रहेको राष्ट्रपतिको कार्यालयले जानकारी दिएको छ ।
