चामे, २६ कार्तिक । चुनाव प्रचार प्रसारका लागि नार्पाभूमि गाउँपालिकामा घरदैलोमा खटिएका प्रतिनिधि सभाका लागि नेपाली कांग्रेस मनाङका उम्मेद्वार टेकबहादुर गुरुङ माथि आक्रमण भएको छ । कार्तिक २५ गते शुक्रबार नार्पाभूमी गाउँपालिकाको नार गाउँमा घरदैलो कार्यक्रम सकेर नार गेस्ट हाउसमा बास वसिरहेका उम्मेद्वार गुरुङ माथि एमालेका प्रतिद्वन्दी पोल्देश छोपाङ गुरुङको निर्देशनमा शुक्रबार मध्यरातमा होटल कम्पाउण्ड भित्रै पसि ढुंगा मुढा लाठि चिर्पट वर्साउँदै आक्रमण भएको नेपाली कांग्रेस मनाङका सचिव सुरेन्द्र गुरुङले बताएका छन् ।

आक्रमणमा नार्पाभूमि गाउँपालिका उपाध्यक्ष मेङमार फुन्चो लामा सहित १८–२० जना ढुंगा र लठ्ठी लिएर आएका व्यक्तिहरुले होटल कम्पाउण्ड भित्र प्रवेश गरी नेपाली कांग्रेसका उम्मेद्वार टेक बहादुुर गुरुङ बसेको कोठालाई लक्षित गरी ढुंगा, मुढा वर्साएको र वडा नं– १ का वडा अध्यक्ष समेत रहेका होटल सञ्चालक फुर्पा ठेले लामा सम्झाउन जाँदा निजलाई ढुङगा लाठि चिर्पट समेतले हानि सख्त घाइते बनाएका छन् । उनको टाउकोमा २२ टाँका लगाइएको र थप उपचारको लागि हेलिकप्टर मार्फत काठमाडौं लाने तयारी भईरहेको खबर प्राप्त भएको छ । उनीसहित ३ जना घाइते भएका र उनीहरुको स्थानिय स्वास्थ्य चौकीमा उपचार भइरहेको छ ।

मनाङमा नेकपा एमालेबाट पोल्देन छोपाङ गुरुङ र नेकाका टेक बहादुर गुरुङ वीच प्रतिनिधि सभा सदस्यमा प्रतिस्पर्धा हुँदै छ । अघिल्लो निर्वाचनमामा एमालेले जितेको उक्त क्षेत्रमा यस पटक मतदानको पूर्व सन्ध्यामा एमालेका उम्मेदवार पोल्देन छोपाङ गुरुङको निर्देशनमा छापामार सैलीमा कांग्रेस उम्मेद्वार माथि मध्यरातमा भएको आक्रमणलाई अर्थपूर्ण रुपमा हेरिएको छ । नेपाली कांग्रेस मनाङका सचिव सुरेन्द्र गुरुङले बताए अनुसार आक्रमणको नेतृत्व गरेका मेङमर फुन्चो लामा एमालेबाट नार्पाभूमी गाउँपालिकाका उपाध्यक्ष निर्वाचित भएका थिए ।

उम्मेद्वार माथि भएको आक्रमणमा संलग्न दोषी उपर कारवाही गर्न स्थानिय प्रशासन र निर्वाचन आयोग समक्ष २६ गते शनिबार नै जाहेरी दिने तयारी भइरहेकोको गुरुङका कानुनी सल्लाहकार लक्ष्मण खनियाले जनाएका छन् । हामी आक्रमणको प्रतिकार होइन कानूनी उपचार खोज्छौं खनियाले भने । यसै वीच आक्रमणमा संलग्न एमालेबाट निर्बिरोध निर्वाचित मेङमर फुन्चो लामा समेतलाई निर्वाचन आचार संहिता २०७९ बमोजिम कारवाही गर्ने तयारी गरेको श्रोतको दावी छ ।