हिमपात र चिसोका कारण मनाङमा विकास निर्माण ठप्प

हिमपात र चिसोका कारण मनाङमा विकास निर्माण ठप्प

मनाङ–अत्याधिक चिसो बढेसँगै हिमालपारिको जिल्ला मनाङमा विकास निर्माणका काम ठप्प भएका छन्। चिसो बढेसँगै खोलाहरु जमेका छन् भने माथिल्लो भेगमा सोमबारदेखि परेको हिमपातले जनजीवन कष्टकर भएको छ।


केही दिन अगाडि खोला जमेर खानेपानीको अभाव झेल्दै आएका स्थानीय बासिन्दालाई हिमपातले घरभित्रै बस्न बाध्य बनाएको छ। मानिस त जसोतसो घरभित्र रहे पनि पशुचौपाय हिमपातको शिकार भएको पशुपालक किसान चोल्पा गुरुङले बताए। उनका अनुसार माथिल्लो मनाङ खांसार मनाङगाउँलगायतका ठाउँमा निर्माण भइरहेका काम रोकिएका छन्।


चिसोमा सिमेन्ट ‘सेट’ नहुने र कामदारले काम गर्न नसक्ने हुँदा सडक, खानेपानी र सिँचाइका काममा अवरोध आएको हो। त्यस्तै बर्खामा बाढीपहिरो र हिउँदमा हिमपातका कारण विकास निर्माणले गति लिन नसकेको पूर्वाधार विकासका प्रमुख नवीनचन्द्र अधिकारीले बताए। अहिले पूर्वाधारअन्तर्गतका काम सञ्चालन हुनसकेको छैन।


प्राकृतिक प्रकोपका कारण पनि विकास निर्माणले गति लिन नसकेको उनले बताए। पाँच वर्षदेखि अलपत्र रहेका मनाङका खोलामा पक्की मोटरपुल अझै सम्पन्न हुनसकेका छैनन्। हाल जिल्लामा रहेका प्रदेश र सङ्घ मातहतका विकास आयोजना पनि चिसोका कारण काम हुन नसकेको जिल्ला पूर्वाधार कार्यालय मनाङले जनाएको छ। पूर्वाधार कार्यालयका अनुसार हाल जिल्लामा सडक स्तरोन्नति, मोटरपुल निर्माण, जिल्ला कारागार, अस्पताल, सिटीहल निर्माणका काम भए पनि चिसोका कारण रोकिएको छ।रासस

सम्बन्धित समाचार